Bunnskanzler Olaf Scholz will sik vundaag tosamen mit de Ministerpräsidentin Anke Rehlinger en Bild vun de Laag in’t Saarland maken. Dörch den Duerregen harr dat Hoochwater geven un de Eer is wegrutscht. Vele Minschen müssen ruut ut jümehre Wahnungen un Hüüs. Nu sünd de Lüüd dorbi, optorümen.
Klimaschuul-Aktivisten, de hebbt hüüt Fröh vun Klock 5 af an den Münchner Flooghaven lahmleggt. Wat en Spreker seggt, sünd se na den Flooghaven rinkamen un hebbt sik op de Rullbahnen fastkleevt. Woveel Aktivisten dat sün, dat is noch nich kloor. De Polizei is noch dorbi, de Saak to regeln. Wat de Flooghaven seggt, is in de Twüschentiet en Pist wedder freegeven worrn. Lüüd, de flegen wüllt, de mööt liekers dormit reken, dat Flöög utfallen doot oder dat dat later warrt.
De Hamborger, de mit de S-Bahn ünnerwegens sünd, de mööt bet to’n 26. Mai mit Maleschen reken. De Bahn sparrt nämlich twei Strekenafsnee, op de veel föhrt warrt. Twüschen Hauptbahnhoff un Steernschanz un twüschen Blanknees un Wedel, dor föhrt nu Busse un keen Bahnen. Bavento warrt en Behölpsbrüüch bi de Kunsthall opboot. Un in Sülldörp maakt se en Footgängerbrüüch nee.
Lüüd, de pleegt warrn mööt, de mööt in Hamborg för en Platz in en Heim in’n Snitt 2.800 Euro in’n Maand sülvst dorto betahlen. De Soziaalbehöörd meent, dat liggt ünner annern an den högeren Minnestlohn pro Stunn för dat Personaal in de Pleeg. Somit warrt de Tahl vun de Lüüd, de sik ein Heim nich leisten köönt, wohl wieder na baven gahn. Dat sä de Spreker vun de Soziaalbehöörd, Wolfgang Arnhold de „Welt am Sonntag“. In Hamborg köönt rund 1.300 Plätz in Pleegheime nich nutzt warrn, wiel dat to wenig Personaal geven deit.
Bunnsgesundheitsminister Karl Lauterbach, de hett güstern den ne’en Bunns-Klinik-Atlas vörstellt. He hett ok glieks künnig maakt, dat dor noch wat nabetert warrt. De Hamborger Krankenhuus-Sellschop, de is nämlich opfullen, dat dor noch Fehler binnensteken doot. To’n Bispill sünd en poor Angaven to de Nootopnahmen vun Hamborger Krankenhüüs noch nich richtig.
Op dat Hilligengeistfeld, is vundaag de Active City Arena losgahn. Vun Klock 9 af an speelt dor in dat mobile Stadion Beachvolleyball-Profis. De beiden Hamborger Lukas Pfretzschner un Sven Winter, de wüllt dor Tickets för de Olymp’schen Spelen kriegen. De beiden un noch en anner düütschet Team, de speelt hüüt Namiddag vun Klock 4 af an. Dat Finaal is denn an‘n Maandag.
Hüüt is dat eerst fröndlich. Köönt ok Wulken langkamen. Later kaamt Flöög daal un dat kann ok gewiddern bi bet to 22 Graad. Opstunns meet wi bi ju in St. Georg 14 Graad. De Wind weiht flau bet middel-dull ut Noordoost. Morgen kriegt wi mehr Wulken as Sünn. Dat gifft Flöög un Gewidder bi bet to 21 Graad. Pingstmaandag gifft Wulken un Sünn un dat warrt wedder en beten wärmer.
